Azərbaycanın Ermənistanı cəzalandırmaq zərurəti

Ermənistan 10 noyabr üçtərəfli bəyanatının müddəalarını pozaraq regionu qan gölünə çevirməyə çalışır.

Rəsmi Bakı dəfələrlə İrəvana xəbərdarlıq etsə də, Ermənistan daxili və xarici təsir dairələri altında destruktiv mövqe nümayiş etdirməyə davam edib. Əbəs deyil ki, sülh sazişinin imzalanması ehtimalının yüksək olduğu bir vaxtda Ermənistan ənənəvi metodundan istifadə edərək yenə də prosesi pozmaq üçün siyasi və hərbi təxribata əl atır. Azərbaycan Ordusu məhz bu cür təxribatlara son qoymaq üçün alternativ yolları nəzarətə götürmək üçün zəruri addımlar atmaq məcburiyyətində qalıb.

Təbii ki, Azərbaycan öz suveren ərazilərinə Ermənistandan gizli yollarla silah-sursat və canlı qüvvə daşınmasına göz yummaq niyyətində deyil və bu haqda dəfələrlə ən yüksək səviyyədə həm qarşı tərəfə xəbərdarlıq edib, həm də bölgədəki Rusiya sülhməramlılarını məlumatlandırıb. Lakin nə Ermənistan, nə də sülhməramlılar müvafiq nəticə çıxarıblar. Ona görə də Azərbaycan Vətən müharibəsində olduğu kimi, postmünaqişə dövründə də analoji strategiya nümayiş etdirməyə məcbur olub.

Əlbəttə ki, baş verə biləcək istənilən qarşıdurmaya görə məsuliyyət Ermənistanın üzərinə düşür. Bu baxımdan beynəlxalq ictimaiyyət sülh sazişinin imzalanmasında və münaqişənin yenidən aktiv fazaya keçməməsində maraqlıdırsa, Ermənistanı təxribatlara son qoymağa, prosesin pozulmasına yönələn addımlardan çəkinməyə məcbur etməlidir.