Azərbaycanla nəqliyyat sahəsindəki əməkdaşlığımız böyük önəm daşıyır | Gürcüstanlı nazir

Mayın 1-dən Gürcüstan və Azərbaycan arasında dəmir yolu ilə sərnişindaşımalarına başlanılacaq.

Bu barədə Gürcüstan Baş nazirinin birinci müavini, iqtisadiyyat və davamlı inkişaf naziri Levan Davitaşvili Tbilisidə səfərdə olan rəqəmsal inkişaf və nəqliyyat naziri Rəşad Nəbiyevlə görüşündən sonra açıqlamasında bildirib.

“Azərbaycanla nəqliyyat sahəsindəki əməkdaşlığımız iqtisadi əməkdaşlığımız çərçivəsində böyük önəm daşıyır. Ona görə də il ərzində həmkarlarımızla görüşüb planlarımız barədə müzakirələr edirik. Bu gün də həmkarım – Azərbaycanın nəqliyyat naziri ilə görüşüb Bakı – Tbilisi – Qars dəmir yolu xətti, Orta dəhlizin perspektivləri, eləcə də Azərbaycanla 1 may tarixindən açılacaq dəmir yolu ilə sərnişin daşımaları məsələləri barədə söhbət apardıq. Azərbaycanla dəmir yolu ilə sərnişindaşımalara başlanılması turizmimiz üçün çox vacibdir.

Azərbaycanlı həmkarlarımızla görüşdə cari il üçün daşımalarla bağlı proqnozu da müzakirə etdik. Əlbəttə, planlarımızı və baxışlarımızı bölüşmək çox vacib idi ki, maksimum koordinasiya ilə regionda və beynəlxalq miqyasda daha rəqabətədavamlı ola bilək”, – deyə nazir qeyd edib.

Məlumat üçün onu da bildirək ki, görüşdə “Azərbaycan Dəmir Yolları” QSC-nin sədri Rövşən Rüstəmov və Gürcüstan Dəmir Yollarının rəhbər şəxsləri iştirak ediblər.