Azərbaycanlı heyət Brüsseldə bu ifadələri məruzədən çıxartdırdı

Avronest Parlament Assambleyasının hazırladığı məruzədə "Dondurulmuş Dağlıq Qarabağ münaqişəsi" ifadəsi çıxarılıb.

Bu barədə Belçikanın Brüssel şəhərində keçirilən Avronest Parlament Assambleyasının 11-ci sessiyasında siyasi məsələlər, insan hüquqları və demokratiya komitəsində müzakirələr aparılıb.

Sessiyada müzakirələrdə iştirak edən Milli Məclisin deputatları – Tahir Mirkişili, Tural Gəncəliyev və Nurlan Həsənov regionun təhlükəsizliyində Azərbaycanın müstəsna rolu, eləcə də sülh müqaviləsinin imzalanması və regional kommunikasiyaların açılmasının vacibliyini vurğulayıblar.

Həmçinin Azərbaycan nümayəndə heyətinin təklif etdiyi və səs çoxluğu ilə qəbul edilən dəyişikliklər nəticəsində "Azərbaycan-Ermənistan sərhədlərinin müəyyən edilməsində Alma-Ata deklarasiyasına istinad etmə", "sülh danışıqlarının yalnız Brüsselin vasitəçiliyi ilə aparılması" kimi ifadələr də məruzənin mətnindən çıxarılıb. Əvəzində isə Azərbaycan-Ermənistan münasibətlərinin normallaşması prosesinə hər kəsin dəstək verməli olduğu, bu prosesin beynəlxalq hüquq normalarına uyğun aparılması məruzədə öz əksini tapıb.

Qeyd edək ki, Avronest Parlament Assambleyasının sosial məsələlər, işsizlik, təhsil, mədəniyyət və vətəndaş cəmiyyəti komitəsinə növbəti 1 il ərzində Azərbaycan nümayəndə heyətinin sədri Tahir Mirkişili rəhbərlik edəcək.