Bakı kəndlər barədə məhz bunu istədi ki... | Erməni ekspertdən açıqlama

Qazaxın anklav olmayan 4 kəndinin (Bağanis Ayrım, Qızıl Hacılı, Aşağı Əskipara və Xeyrimli) Azərbaycana qaytarılması Ermənistanın siyasi-ictimai gündəmini alt-üst edib.

Ermənistan müxalifəti və mövcud hakimiyyəti qəbul etməyənlər Nikol Paşinyana qarşı ittihamlar irəli sürür.

Bu kontekstdə erməni ekspert Naxri Xoxikyanın açıqlaması xüsusilə diqqət çəkir.

N.Xoxikyan iddia edir ki, kəndlərin təhvil verilməsi 23-24 aprelə – qondarma “erməni soyqırımı”nın ildönümünə hesablanıb. Onun iddiasına görə, bu, məhz rəsmi Bakının tələbi ilə baş verir.

“Simvolik günlərə diqqət edin, bunlar azərbaycanlılar üçün önəmlidir. 2020-ci ilin 27 sentyabrında müharibə başladı. Düz 100 il əvvəl – 1920-ci ilin 27 sentyabrında Türkiyə Qarsı ələ keçirmişdi.

Ermənistanın kapitulyasiya imzaladığı 2020-ci ilin 9 noyabrında Azərbaycanın bayraq günü idi. Kəlbəcərin Azərbaycana təhvil verildiyi 25 noyabr tarixi Monte Melkonyanın doğum günüdür. 2021-ci ilin 12 may tarixində Azərbaycan Qaragöl sahilini nəzarətə götürdü, 12 may 1994-cü il Azərbaycanın məğlubiyyət sənədi – atəşkəs razılaşmasının imzalandığı gündür.

2023-cü ilin 19-20 sentyabrında Qarabağda hər şey bitdi, bir gün sonra – 21 sentyabrda ermənilər oranı tərk etdi. Həmin gün Ermənistanın müstəqillik günü idi. 2024-cü ilin 19 aprelində Ermənistan 4 kəndi Azərbaycana qaytarmağa razılaşdı. Bu ərazilər Tavuş vilayətinin ən azı 10 kəndinin təhlükəsizliyini və Gürcüstanla dövlətlərarası yolu təmin edən bölgədir.

Hökumət mənbələrinin məlumatına görə, Azərbaycan bu kəndlərin 23-24 aprel tarixində verilməsini tələb edib. Hər kəs 24 aprelin nəyin simvolu olduğunu bilir”, – N.Xoxikyan deyib.