Bakıda növbəti təhlükəsizlik forumu | DTX-dən məlumat

Dövlət Təhlükəsizliyi Xidmətinin təşkilatçılığı ilə 50-yə yaxın ölkənin xüsusi xidmət orqanlarının nümayəndələrinin iştirak etdiyi “Qlobal nəqliyyat şəbəkələrinin təhlükəsizliyinə yönələn müasir çağırışlar” mövzusunda II Bakı Təhlükəsizlik Forumu keçirilib.

Xidmətdən verilən məlumata görə, tədbirdə Prezident İlham Əliyevin forum iştirakçılarına müraciəti səsləndirilib.

Çıxış edən DTX-nin rəisi Əli Nağıyev builki forumun COP29 ərəfəsində keçirilməsinin təsadüfi olmadığına diqqət çəkib.

Enerji resurslarının daşınmasında istifadə olunan nəqliyyat xətlərini hədəf alan terror-təxribat aktlarının qlobal xarakterli iqtisadi və ekoloji fəlakətlərə səbəb ola biləcəyindən və bu xüsusda birgə səylərin daha da gücləndirilməsinin və ümumi fəaliyyətin səmərəliliyinin artırılmasının zəruriliyindən danışıb. General-polkovnik Əli Nağıyev bu konfransın qlobal nəqliyyat dəhlizlərinin təhlükəsizliyinin üzləşdiyi risklərlə mübarizədə ortaq yanaşmaların formalaşdırılmasına və fəaliyyət strategiyasının təkmilləşdirilməsinə öz töhfəsini verəcəyinə əminliyini ifadə edib.

Sonda Prezident İlham Əliyevin təşəbbüsü ilə Bakı Təhlükəsizlik Forumunun Bakıda daimi əsasda fəaliyyət göstərəcək Katibliyinin yaradılması iştirakçı ölkələr tərəfindən yekdilliklə dəstəklənib.