Baş nazir müavinlərinin sərhəddə növbəti görüşü keçirildi

Azərbaycan-Ermənistan sərhədinin delimitasiyası üzrə komissiyaların növbəti iclası keçirilib.

Xarici İşlər Nazirliyindən verilən xəbərə görə, martın 7-si Azərbaycanla Ermənistan arasındakı sərhəddə Azərbaycan Baş nazirinin müavini Şahin Mustafayev və Ermənistan Baş nazirinin müavini Mher Qriqoryanın sədrliyi altında iki ölkə arasında dövlət sərhədinin delimitasiyası üzrə Dövlət Komissiyasının və Ermənistanla Azərbaycan arasında dövlət sərhədinin delimitasiyası və sərhəd təhlükəsizliyi məsələləri üzrə komissiyanın 7-ci görüşü baş tutub.

Tərəflər delimitasiya məsələləri üzrə fikir mübadiləsi aparıb və sözügedən komissiyaların birgə fəaliyyəti haqqında əsasnamə layihəsinin razılaşdırılmasına başlayıb, habelə delimitasiya işlərinin görülməsinin qaydası üzrə müvafiq təlimatların layihələrini müzakirə ediblər.

Əsasnamə layihəsinin razılaşdırılmasının ən qısa zamanda başa çatdırılması barədə razılıq əldə olunub.

Tərəflər həmçinin komissiyaların növbəti görüşünün keçirilməsinin tarixini və yerini işçi qaydada müəyyən etmək barədə sövdələşiblər.