Birləşmiş Krallıq və Azərbaycan rəsmiləri görüşdü

Noyabrın 30-da xarici işlər naziri Ceyhun Bayramov Birləşmiş Krallığın Müdafiə Nazirliyinin silahlı qüvvələr üzrə dövlət naziri Ceyms Hippi ilə görüşüb.

Bu barədə Xarici İşlər Nazirliyindən məlumat verilib.

Ölkələr arasında siyasi, iqtisadi, enerji təhlükəsizliyi, qarşılıqlı investisiyalar və digər sahələrdə əməkdaşlığın inkişaf perspektivləri, habelə hazırkı regional vəziyyət əsas müzakirə mövzusu olub.

Görüş zamanı nazir Ceyhun Bayramov Azərbaycan və Ermənistan arasında postmünaqişə dövründə normallaşma gündəliyi haqqında qarşı tərəfi məlumatlandırıb. Ermənistanın sülh sazişinin imzalanması prosesində yaratdığı maneələr və Azərbaycanın bu prosesin irəlilədilməsi üçün atdığı addımlardan söz açılıb.

Bundan əlavə, Ceyhun Bayramov Azərbaycan 24 saatdan az müddətdə keçirilən antiterror tədbirlərini səciyyələndirən amillər barədə qarşı tərəfi məlumatlandırıb.