Ceyhun Bayramov və britaniyalı nazir arasında vacib telefon danışığı

“Azərbaycan tərəfinin təşəbbüskarı olduğu sülh sazişi üzrə danışıqlar prosesində ciddi irəliləyiş var”.

Azərbaycanın xarici işlər naziri Ceyhun Bayramov Birləşmiş Krallığın Avropa, Şimali Amerika və dənizaşırı ərazilər üzrə dövlət naziri Stiven Dauti arasında telefon söhbəti zamanı bu barədə məlumat verib.

Ümumilikdə sülh müqaviləsi layihəsinin razılaşdırılması üzrə iş aparıldığını qeyd edən Ceyhun Bayramov eyni zamanda Ermənistan Konstitusiyasında ölkəmizə qarşı olan ərazi iddialarının prosesdə əsas maneə təşkil etdiyini diqqətə çatdırıb.

XİN-dən verilən məlumata görə, telefon danışığı zamanı həmçinin iki ölkə arasında əməkdaşlığın gündəliyi, habelə mövcud regional vəziyyət də müzakirə olunub.

Tərəflər Azərbaycanla Birləşmiş Krallıq arasında xüsusilə energetika, təhsil, qarşılıqlı investisiyalar və digər sahələrdə əməkdaşlıqdan məmnunluq ifadə edərək, iki ölkə arasında son vaxtlar siyasi dialoqun intensivləşməsinin, qarşılıqlı səfərlərin, eləcə də hökumətlərarası komissiyaların işinin bərpasının yeni sahələr üzrə əməkdaşlığın inkişafına təkan verəcəyini bildiriblər.

Nazir Ceyhun Bayramov Azərbaycanın bölgəmizdə dayanıqlı sülhün təsis edilməsi üzrə baxışları, bu istiqamətdə atılan praktiki addımlar barədə qarşı tərəfi ətraflı məlumatlandırıb.

Söhbət zamanı iki ölkə arasında alternativ enerji sahəsində əməkdaşlığın müxtəlif istiqamətləri, SOCAR və BP arasında günəş enerjisinin istehsalı üzrə aparılan işlər, eləcə də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına hazırlıq məsələləri müzakirə olunub.