Ceyhun Bayramovdan mühüm açıqlama: İsrail-Fələstin müharibəsində zərərçəkənlərə görə yardım

Azərbaycan beynəlxalq hüquq normaları, habelə müvafiq BMT qətnamələrinə uyğun olaraq İsrail-Fələstin münaqişəsinin Şərqi Qüdsün Fələstin dövlətinin paytaxtı olması ilə iki dövlət prinsipi əsasında həllinə tərəfdardır.

Bunu xarici işlər naziri Ceyhun Bayramov Səudiyyə Ərəbistanında İslam Əməkdaşlıq Təşkilatının İcraiyyə Komitəsinin İsrail-Fələstin münaqişəsinə həsr olunan növbədənkənar iclasında çıxış edərkən deyib.

Nazir bildirib ki, İslam həmrəyliyinə hər zaman sadiq qalan ölkəmiz Fələstin xalqının dövlətçilik mübarizəsini dəstəkləyir və bölgədəki təhlükəsizlik vəziyyətinin ciddi şəkildə pisləşməsi ilə nəticələnən son hadisələr narahatlıq doğurduğundan hərbi əməliyyatların və eskalasiyanın dayandırılması vacibdir.

Münaqişənin nəticələrinin aradan qaldırılması istiqamətində Azərbaycanın səylərindən bəhs edən Ceyhun Bayramov ölkəmizin fələstinli qaçqınlara dəstək məqsədilə BMT-nin Yaxın Şərq Agentliyinə 1,6 milyon dollar maliyyə töhfəsi verdiyini də diqqətə çatdırıb.