CHP ilə əlaqələr necə normallaşdı? - İmamoğlunun Bakı səfərində diqqətçəkən nüans

Türkiyənin İstanbul şəhərinin bələdiyyə başqanı Əkrəm İmamoğlu COP29 çərçivəsində Azərbaycana gəlib.

O, ümummilli lider Heydər Əliyevin məzarını və Bakıda Türk Şəhidliyini ziyarət edib.

Maraqlıdır ki, bir müddət öncə onun üzvü olduğu Cümhuriyyət Xalq Partiyasının sədri Özgür Özəl də Azərbaycan Prezidenti İlham Əliyevə zəng etmişdi.

Siyasi şərhçi Asif Nərmanlının fikrincə, CHP rəsmilərinin Azərbaycana səfəri, bu partiyanın ölkəmizlə münasibətlərinin normallaşması onların mövqeyinin nəticəsidir.

“Keçmiş sədr Kamal Kılıçdaroğlunun dövründə CHP təkcə Türkiyədə deyil, Qərbdə də Azərbaycana qarşı olan qüvvələrin xəttini izləyirdi. Onun Zəngəzur dəhlizinin əleyhinə olan layihəni irəli sürməsi də bunu əyani şəkildə göstərdi. Lakin CHP-də rəhbər dəyişikliyindən sonra bu partiyanın hakim Ədalət və İnkişaf Partiyası ilə münasibətlərində normallaşma dövrü başladı. Eyni vəziyyət Bakıya qarşı münasibətdə də müşahidə edilir.

Təbii ki, Azərbaycan heç vaxt Türkiyənin ana müxalifət partiyası ilə münasibətlərin gərginləşməsində maraqlı olmayıb. Bu baxımdan Bakı CHP-dən uzadılan əli geri çevirmir. Lakin bu, Azərbaycanın Türkiyənin daxili siyasətinə qarışması, yaxud Ərdoğana qarşı olan qüvvələrlə əməkdaşlıq etməsi demək deyil. Çünki CHP ilə əlaqələrin normallaşması bu partiyanın Türkiyə daxilində AKP ilə münasibətlərinin yumşalması çərçivəsində baş verir”, – A.Nərimanlı bildirib.

Qeyd edək ki, Əkrəm İmamoğlunun Türkiyədə keçiriləcək növbəti prezident seçkilərində CHP-nin namizədlərindən biri kimi adı çəkilir.