Diqqət: İlham Əliyev Fələstin Prezidentinə məktub göndərdi

Azərbaycan Qəzzadakı gərginliyin tezliklə aradan qaldırılacağına ümid edir.

Bu barədə Prezident İlham Əliyev Fələstin Prezidenti Mahmud Abbasa ölkənin milli bayramı münasibətilə ünvanladığı məktubda bildirib.

Dövlət başçısı Azərbaycanın Fələstin məsələsinə münasibətdə daim həmrəylik nümayiş etdirdiyini və bu məsələnin BMT-nin müvafiq qətnamə və qərarlarına uyğun olaraq iki dövlət prinsipi əsasında həllini dəstəklədiyini vurğulayıb.

Bildirib ki, ölkəmiz BMT-nin Fələstinli Qaçqınlara Yardım və İşlərin Təşkili üzrə Yaxın Şərq Agentliyinə bundan sonra da dəstək göstərməyə davam edəcək.

Prezident həmçinin qeyd edib ki, ötən il Azərbaycanın Fələstində diplomatik nümayəndəliyinin təsis edilməsi ikitərəfli əlaqələrin inkişafı istiqamətində atılan müsbət addım idi. Azərbaycanın Fələstində məktəb inşa etmək məsələsi də gündəlikdədir.

Sonda iki ölkə arasında xoş ənənələrə malik dostluq əlaqələri və əməkdaşlığın bundan sonra da uğurla inkişaf edəcəyi vurğulanıb.