DTX-nin cinayət başında yaxaladığı şəxs kimdir?

Dövlət Təhlükəsizliyi Xidmətinin əməkdaşları İsrailin Bakıdakı səfirliyinə hücumun qarşısını alıblar. Bu barədə İsrailin Xarici İşlər Nazirliyindən məlumat verilib.

Bildirilib ki, iranəsilli olduğu güman edilən silahlı şəxs İsrailin Azərbaycandakı səfirliyinə daxil olmağa cəhd göstərsə də, Azərbaycanın Dövlət Təhlükəsizliyi Xidmətinin əməkdaşları bunun qarşısını alıb. O, həbs edilib və 4 ay müddətinə nəzarət altına alınıb.

Qeyd edək ki, Bakı şəhəri Səbail Rayon Məhkəməsində Dövlət Təhlükəsizliyi Xidməti müstəntiqinin M.H.Hüseyinzadə soyadlı şəxs barəsində verilmiş vəsatətinə baxılıb. Məlumata görə, məhkəmənin qərarı ilə Hüseyinzadə barəsində 4 ay müddətinə həbs qətimkan tədbiri seçilib.

İş materiallarından məlum olur ki, uzun müddət gizli müşahidələr aparmış həmin şəxs 2023-cü ilin noyabr ayında xarici dövlətin Azərbaycandakı diplomatik nümayəndəliyinin Bakıda olan inzibati binasına silahlanmış vəziyyətdə terror aktı törətmək üçün soxulmağa cəhd edərkən DTX əməkdaşlarının keçirdiyi əməliyyat tədbirləri nəticəsində cinayət başında saxlanılaraq tərk-silah edilib. Hüseyinzadə Cinayət Məcəlləsinin müvafiq maddələri ilə təqsirləndirilir.