Əliyev, Mişel və Paşinyanın Brüssel görüşünün tarixi açıqlandı
Azərbaycan Prezidenti İlham Əliyev, Avropa İttifaqı Şurasının Prezidenti Şarl Mişel və Ermənistanın Baş naziri Nikol Paşinyan arasında növbəti üçtərəfli görüş iyulun 15-də Brüsseldə baş tutacaq.
Bu barədə Ermənistanın Baş naziri hökumətin iclasında bildirib. Paşinyan görüş zamanı sülh sazişi üzrə danışıqlarda irəliləyişin qeydə alınacağına ümid etdiyini deyib.
Baş nazir həmçinin xatırladıb ki, bir gün əvvəl Ermənistan və Azərbaycan şərti sərhədində iki ölkənin baş nazirlərinin müavinləri – Mqer Qriqoryan və Şahin Mustafayevin iştirakı ilə sərhədlərin delimitasiyası üzrə iki ölkənin komissiyalarının birgə iclası keçirilib.
Qeyd edək ki, liderlərin görüşü iyulun 21-nə nəzərdə tutulmuşdu. Sonradan Ermənistan Təhlükəsizlik Şurasının katibi Armen Qriqoryan tədbirin planlaşdırıldığından əvvəl ola biləcəyi barədə xəbər verdi.