Eritreyada saxlanılan gəmiçilərimiz azadlığa buraxılaraq ölkəyə gətirilib

Xarici İşlər Nazirliyi Eritreyada saxlanılan gəmilərin heyətinin ölkəmizə geri gətirilməsi ilə bağlı məlumat yayıb.

Qeyd olunub ki, ötən ilin noyabrın 7-dən etibarən Eritreya tərəfindən saxlanılan “Caspian Marine Services B.V.” şirkətinin Azərbaycandakı filialı tərəfindən istismar olunan “CMS Pəhləvan”, “CMS İgid” və “CMS-3” gəmilərinin heyətindəki 18 nəfər Azərbaycan vətəndaşı dövlət başçısının tapşırıqlarına uyğun olaraq Xarici İşlər Nazirliyinin, Rəqəmsal İnkişaf və Nəqliyyat Nazirliyinin, habelə “Azərbaycan Xəzər Dəniz Gəmiçiliyi” Qapalı Səhmdar Cəmiyyətinin birgə əlaqələndirmə işləri nəticəsində aparılan uzunmüddətli danışıqlardan sonra azadlığa buraxılaraq ölkəmizə geri gətirilib.

“Gəmi heyəti Eritreyada olan müddət ərzində ölkəmizin Efiopiyadakı Səfirliyi vasitəsilə heyətə konsulluq dəstəyi göstərilib, onların müvafiq qaydada ehtiyaclarının qarşılanması məqsədilə aidiyyəti üzrə tədbirlər həyata keçirilib.

Bu prosesdə yaxından dəstək göstərən Türkiyənin Eritreya Dövlətindəki Səfirliyinə dərin minnətdarlığımızı bildiririk”, ‒ deyə XİN-in məlumatında bildirilib.