Erməni politoloq regionda güc mərkəzlərindən danışdı: Ermənistana heç kim kömək edə bilməyəcək

“Cənubi Qafqazı ayrıca şahmat taxtası kimi götürsək, o zaman bu bölgədə Rusiya, Türkiyə və İran kimi təsir güclərinə malik mərkəzlərin olduğunu görərik. Bu üç qüvvə Cənubi Qafqazda nüfuz uğrunda mübarizə aparır. Bunların hər birinin ayrı-ayrı, eyni zamanda üst-üstə düşən maraqları var”.

Bunu erməni politoloq Ara Poqosyan deyib. Onun sözlərinə görə, bu güclərin hər biri Cənubi Qafqazda öz mövqeyini möhkəmləndirməyə çalışır. Poqosyanın fikrincə, İrəvanla Ankaranın maraqları üst-üstə düşməsə də, Moskva və Terhanla müəyyən mənada üst-üstə düşür.

“Rusiya ilə bəzi maraqlarımız bu gün obyektiv və subyektiv səbəblərə görə ziddiyyət təşkil etsə də, müəyyən situasiyalarda razılığa gəlmək mümkündür. İrəvanın hazırda maraqları böyük ölçüdə İranla üst-üstə düşür”, – o qeyd edib.

Politoloq bildirib ki, Türkiyənin məqsədi Cənubi Qafqazı özünün təsir dairəsinə çevirmək və onu Turan məkanının bir hissəsinə və ya heç olmasa, təhlükəsiz və maneəsiz buferə çevirməkdir:

“Sonucda qlobal gücə çevrilməkdir. Rusiya üçün o təhlükəsizlik məkanı qurmaq və çarizm və sovet dövrü məkanında təsir dairəsi kimi saxlamaqdır ki, bu da ona qlobal güc kimi öz yerini bərqərar etməyə imkan verəcək. Üstəlik, Rusiya bunun üçün “yumşaq güc” vasitəsilə deyil, həm də “sərt güc” vasitəsilə formallıq olmadan mübarizə aparmağa hazırdır. İran tarixi nüfuzunu bərpa etmək yolundadır. İran öz növbəsində öz məqsədlərinə hərbi-diplomatiya, təmsilçi qüvvələr və ya birbaşa hərbi müdaxilə yolu ilə mübarizə aparmağa hazırdır.

Cənubi Qafqaz şahmat taxtası kimi hər zaman barıt çəlləyini xatırladacaq. Cənubi Qafqaz və ümumiyyətlə, Şərq güclülər məkanıdır, zəiflər gec-tez məhv olacaqlar. Ermənistanın bu şahmat taxtasından kənarda qalması isə çox təhlükəlidir. Belə olan halda Ermənistanı heç kim xilas edə bilməyəcək”.