Ermənistan eyni anda bir neçə sahibə xidmət edir | Arkovdan sensasiyalı şərh

Ermənistanın hazırkı hakimiyyəti Qərbdəki yeni "dostlarına" arxalanır. Ermənistan hakimiyyətinin planlarına görə, bu "dostlar" İkinci Qarabağ müharibəsinin nəticələrinə yenidən baxılmasına və Azərbaycanı erməni əhalisini bölgəyə qaytarmaq adı altında Ermənistana Qarabağ üzərində ən azı faktiki nəzarəti "qaytarmağa" məcbur etməlidirlər.

Bu sözləri Axar.az-a açıqlamasında Cənubi Qafqaz üzrə ekspert, PolitRus ekspert-analitik şəbəkəsinin rəhbəri Vitali Arkov deyib.

"Bu, Ermənistanı regionda öz ekspansiyasını genişləndirmək üçün əməliyyat meydanı hesab edən Qərbin – ilk növbədə, Fransa və ABŞ-nin maraqları ilə üst-üstə düşür. Buna görə də Ermənistana bəzi silahlar verilir, hərbi məsləhətçilər göndərilir, komandoslar və xüsusi xidmət orqanlarının əməkdaşları sülhməramlılar adı altında kəşfiyyat işləri aparmaq üçün yerləşdirilir", – ekspert qeyd edib.

V.Arkovun fikrincə, Ermənistan hakimiyyəti onlara səxavətlə pul verildikdə həmişə bir neçə sahibə eyni vaxtda xidmət etmək bacarığı ilə seçilib:

"Buna görə də Hindistan silahlarının tədarükü baxımından mən Ermənistanı da nominal alıcı hesab edirəm. Məncə, real alıcı üçüncü tərəfdir, ola bilsin ki, Hindistan mövcud məhdudiyyətlərə görə birbaşa silah verə bilmir. Müasir dünyada bu, adi haldır.

Vaxtilə Bakı Tehranla İrəvan arasında külli miqdarda raket sistemlərinin tədarükü ilə bağlı danışıqlara həssas yanaşırdı. Əslində, bu silahlar Ermənistan Ordusu üçün nəzərdə tutulmamışdı".