Ermənistan üçün fəlakət yaxınlaşır, yoxsa? | Mixaylovdan sensasiyalı açıqlama

“Bunu başa düşmək lazımdır ki, Ermənistanın Avropa İttifaqına daxil olması prosesinin başlanması haqqında qanun layihəsini təsdiqləməsi hələ heç nə demək deyil. Bir çox ölkələr uzun müddət çalışırdılar ki, Avropa İttifaqına daxil olsunlar, onların sırasında Türkiyə də var. Lakin hələ ki sual altındadır”.

Bunu rusiyalı hərbi ekspert Yevgeni Mixaylov Ermənistan parlamentinin Avropa İttifaqına üzvlük prosesinin başlanılmasına dair qanun layihəsini birinci oxunuşda təsdiqləməsinə münasibət bildirərkən deyib.

O əlavə edib ki, Ermənistan rəhbərliyinin tam olaraq Qərbə doğru yönəlmə strategiyası Rusiya Prezidenti Vladimir Putinlə ABŞ lideri Donald Tramp arasında aparılan danışıqlardan sonra kəskin dəyişə bilər: “Ermənistan eyni vaxtda bir neçə stulda oturmaqla çoxşaxəli oyun oynamaq istəyir. Amma Rusiya bundan öncə də bir neçə dəfə bəyan edib ki, Ermənistan Avropa İttifaqına daxil olmaqla Avrasiya İqtisadi Birliyində olma imkanını birdəfəlik itirəcək. Bu isə Ermənistan üçün fəlakət deməkdir. Hazırda İrəvanda cərəyan edən proseslərin isə heç bir ciddi mənası yoxdur.

Avropa İttifaqının özünün hazırda Ukrayna məsələlərinə görə yetərincə problemi var və Ermənistana ayıracaq zamanı yoxdur. Nikol Paşinyan öz istəklərini dilə gətirir, buna uyğun hərəkət edir. Elə bilirdi ki, Rusiya buna qarşı çıxacaq, lakin Rusiya Prezidentinin mətbuat katibi Dmitri Peskov bunu Ermənistanın suveren hüququ adlandırdı. Sadəcə olaraq, diplomatik dildə danışıqlar gedir. Əslinə qalsa, Rusiya Ermənistanı milli maraqları daxilində saxlamaq məqsədilə Avrasiya İqtisadi Birliyindən çıxmasında maraqlı deyil. Baş verən beynəlxalq hadisələr Ermənistanda Paşinyanın devrilməsi və rusiyayönlü hökumətin hakimiyyətə gəlməsi ilə nəticələnə bilər”.

Y.Mixaylov vurğulayıb ki, əgər bu reallaşarsa, həmin hakimiyyət Azərbaycanla sülh müqaviləsi bağlayacaq və regionda sabitlik yaranacaq.