Ermənistan yeni şantaj üsulu seçib

Ekologiya insan başda olmaqla hər bir canlı üçün həyat deməkdir.

Müasir dövrdə sürətlə inkişaf edən sənaye və texnologiyalar insan həyatına rahatlıq qatdığı kimi ekologiyanın normal düzülüşünə də eyni dərəcədə xələl gətirir. Lakin təəssüflə bildirməliyik ki, bir sıra hallarda regional ekoloji proseslərə yanaşma dövlət siyasətinə çevrilir və bundan digər tərəflərə qarşı şantaj məqsədilə istifadə olunur.

İşğalçılıq, hərbi təcavüz, terror kimi anlayışları özünün dövlət siyasəti kimi qəbul edən Ermənistan ekologiyaya münasibətdə də təhdidedici mövqe tutur.

İstismar müddəti çoxdan başa çatan Metsamor Atom Elektrik Stansiyasının fəaliyyətini nəyin bahasına olursa olsun uzatmaqla bir tərəfdən bu ad altında beynəlxalq təşkilatlardan qrantlar alır, digər tərəfdən isə Qara dəniz və Xəzər dənizi bölgələrində yerləşən bütün tərəfləri ekoterror təhdidi altına salır. Analoji münasibət Araz və Oxçu çaylarına axıdılan tullantılarla da xarakterizə olunur.

Bu məsələ iyulun 5-də Bakı Konqres Mərkəzində Qoşulmama Hərəkatının Əlaqələndirmə Bürosunun nazirlər görüşündə də müzakirə edilib. Prezident İlham Əliyev görüşdəki çıxışında bildirib ki, Ermənistan indi də Azərbaycanın Naxçıvan Muxtar Respublikası ilə sərhədində transsərhəd ekoloji fəlakət törətməkdə davam edir və bununla da 1991-ci il Transsərhəd kontekstdə Ətraf Mühitə Təsirin Qiymətləndirilməsi Konvensiyasından irəli gələn öhdəliklərini pozmuş olur.

Qeyd edək ki, Ermənistanın Arazdəyən kəndində inşa olunan metallurgiya zavodunun illik istehsal gücü 180 min tondan yuxarıdır. Bu isə kifayət qədər böyük həcmdə tullantı və zəhərli qazın təbiətə ziyan vurması deməkdir. Nəzərə almaq lazımdır ki, sözügedən zavod Metsamor AES-lə eyni bölgədə yerləşir.