Ermənistanı Azərbaycanla müharibəyə həvəsləndirənlər kimlərdir? | Ekspertlərdən vacib açıqlama

Dövlətlərin suverenliyi, ərazi bütövlüyü və sərhədlərin toxunulmazlığına hörmət əsaslı Polşa diplomatiyasına “Andjey Dudasayağı” redaktələr olunub.

Belə ki, Ermənistana xüsusi səfər proqramı ilə gedən A.Duda Azərbaycan-Polşa münasibətlərinə vura biləcəyi zərbəyə və rəsmi Bakının xəbərdarlıqlarına məhəl qoymadan Ermənistan-Azərbaycan sərhəd bölgəsinə, hələ də Ermənistanın işğalı altında olan Kərki kəndinə yaxın əraziyə gedib.

Bu ölkə Avropa İttifaqının Ermənistan-Azərbaycan sərhədində müşahidə missiyasının tərkibindəki nümayəndələrinin sayını artırmağı nəzərdən keçirir. Bu isə o deməkdir ki, Avropa İttifaqının “müşahidə missiyası”nın qeyri-qanuni fəaliyyət müddəti uzadılacaq.

Analitiklərin sözlərinə görə, bu kontekstdə Andjey Duda və Ermənistan ittifaqının birgə ssenarisinin məhsulu kimi Ermənistan-Azərbaycan şərti sərhədində təxribatlar, eskalasiya və toqquşma istisna edilmir.

Politoloq Aydın Quliyev bildirib ki, Polşa NATO-nun ən fəal üzvlərindən və anti-Rusiya siyasəti aparan aktiv ölkələrdən biridir:

“Görünür ki, belə şəraitdə A.Duda Ermənistana verilən dəstəklə bu ölkəni həm Azərbaycana qarşı siyasətə həvəsləndirir, həm də Rusiya ilə qarşıdurma şəraitində Ermənistanın mövqelərini gücləndirməyə çalışır”.