Ermənistanın "diplomatik müharibə" cəhdi: iküzlülük siyasətinin ifşası
“Azərbaycan və Ermənistan arasında sülh sazişinin imzalanması ancaq İrəvan hökumətinin sülh prosesində iştirakını imitasiya etməyi dayandıracağı, Azərbaycanın bir il əvvəl təqdim etdiyi və beynəlxalq hüququn beş əsas prinsipinə əsaslanan layihə üzərində konstruktiv şəkildə məşğul olacağı halda mümkün olacaq”.
Bunu Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyov İtaliyanın “Adnkronos” nəşrinə müsahibəsində deyib.
O, sülh sazişinin müsbət nəticəsinin ikili yanaşma nümayiş etdirən Ermənistan hakimiyyətinin səmimiyyət səviyyəsindən asılı olacağını bildirib.
“Ermənistan bir tərəfdən sülh sazişini yekunlaşdırmaq istəyindən danışır, digər tərəfdən isə Azərbaycana qarşı diplomatik müharibəyə başlayıb. Sülh sazişinin əldə olunması üçün Ermənistan əvvəllər götürdüyü öhdəlikləri yerinə yetirməli və verdiyi vədlərə əməl etməlidir. Ermənistan paralel yollarda öz dar siyasi məqsədlərini həyata keçirməyə çalışmaqdan əl çəkməli və ən yüksək səviyyədə sülh sazişi layihəsi ilə bağlı yenidən danışıqlara başlamalıdır”, – deyə Azərbaycan rəsmisi vurğulayıb.
Elçin Əmirbəyov Ermənistanın Qarabağda etnik təmizləmə və soyqırımı ilə bağlı ölkəmizə qarşı irəli sürdüyü ittihamların tamamilə əsassız olduğunu bildirib. Dövlət rəsmisi Azərbaycanın ölkəmizin bütün vətəndaşlarına, o cümlədən Qarabağ bölgəsində yaşayan erməniəsilli sakinlərin hüquqlarına hörmət etdiyini qeyd edib.
Müsahibədə həmçinin Azərbaycan hökumətinin işğaldan azad olunan ərazilərdə infrastrukturun yenidən qurulmasına yeddi milyard dollardan çox vəsait xərclədiyi bildirilib.
Elçin Əmirbəyov piyada və tank əleyhinə minalar, digər partlamamış hərbi sursatlarla çirkləndirilmiş bu ərazilərdə böyük problemlə üzləşdiyimizi, işğal dövründə Ermənistanın bu ərazilərə 1,5 milyona yaxın piyada əleyhinə mina yerləşdirdiyini, bu günə kimi mina terroru nəticəsində Azərbaycanın 337 itki verdiyini diqqətə çatdırıb.