Fuad Nəcəfli vəzifəsindən azad olunması ilə bağlı yayılan xəbərlərə reaksiya verdi

Xəbər verdiyimiz kimi, ötən gün Naxçıvan Muxtar Respublikasında Azərbaycan Prezidentinin səlahiyyətli nümayəndəsi Fuad Nəcəfli vəzifəsindən azad olunub.

O, “Teleqraf”a açıqlamasında işdən çıxarılmasından danışıb.

“Nəinki Naxçıvan, mən bütöv Azərbaycanımızın vurğunuyam. Bir canım var, o da bu Vətənə qurban olsun. Allah cənab Prezidentimizin canını sağ etsin, onu qorusun”, ‒ o qeyd edib.

Fuad Nəcəfli həmçinin vəzifədən azad olunmasına səbəb kimi mətbuatda yayılan xəbərlərə də münasibətini bildirib:

“Sizin peşə yolunuz şərəfli yoldur. Araşdırma etmək mümkündür və bu sizin hüququnuzdur. Mənim nə iləsə bağlı açıqlama verməyim subyektiv olar. Siz isə obyektiv olmalısınız. Bütün peşəkar insanlara salam deyirəm”.

O, Naxçıvandan Bakıya qayıdan zaman təyyarədə çəkilərək sosial şəbəkələrdə yayılan fotosundan da danışıb: “Naxçıvana uçan təyyarələrin biznes sinfi olmur. Bir salon olur və fotoda mən gözləmə zalında deyil, təyyarədəyəm”.

Qeyd edək ki, Fuad Nəcəfli sözügedən vəzifəyə 2022-ci ilin dekabrında təyin olunub.