Hacıqabulda taxıl üzrə hər hektardan məhsuldarlıq 7 ton olub

“Hacıqabulda yerləşən aqroparkda 4 mindən çox hektarda taxıl əkini aparılıb və məhsuldarlıq hər hektardan buğda üzrə 7 tona yaxın olub”.

Bu barədə Azərbaycan Prezidenti İlham Əliyev aprelin 16-da Hacıqabul rayonunda yenidən qurulacaq Şirvan suvarma kanalının təməlqoyma mərasimindəki çıxışında bildirib.

O qeyd edib ki, ölkəmizdə orta məhsuldarlıq hər hektardan 3 tondan bir qədər çoxdur.

“Hacıqabulda heç vaxt – nə sovet vaxtında, nə də müstəqillik dövründə o sahələrdə əkin aparılmayıb. Çünki su yox idi və torpaq da o qədər münbit deyil. Su olanda, yeni texnologiyalar tətbiq ediləndə, texnika, dövlətin dəstəyi, özəl sektorun fəaliyyəti – bütün bu amillər birləşəndə biz bu nəticəni görürük. Amma torpağı daim münbit olan yerlərdə bu rəqəm daha da arta bilər. Hər hektardan taxıl üzrə 7 ton məhsuldarlıq – bu, inkişaf etmiş ölkələrin səviyyəsidir”, – dövlət başçısı əlavə edib.