Hansı rayonlarda sərhəd-buraxılış məntəqələri yaradılacaq? - Yeni sərəncamın detalları

Prezident İlham Əliyev “Azərbaycan Respublikasının ərazisindən keçən beynəlxalq nəqliyyat dəhlizlərinin tranzit potensialının artırılmasına və tranzit yükdaşımaların təşviqinə dair 2024−2026-cı illər üçün Fəaliyyət Planı”nın təsdiq edilməsi haqqında Sərəncam imzalayıb.

Sərəncama əsasən, Azərbaycanın İranla dövlət sərhədində yeni buraxılış məntəqələri inşa olunacaq.

Qeyd edilib ki, Zəngilan rayonunun Ağbənd qəsəbəsində, Naxçıvan Muxtar Respublikasının ərazisində və Astara rayonunda dövlət sərhədində yeni buraxılış məntəqələrinin inşasına dair İranla razılaşdırıldıqdan sonra tikinti işlərinə başlanılacaq.

Fəaliyyət Planında 2024−2026-cı illər ərzində Azərbaycan ərazisindən daşınan tranzit yükdaşımalarının həcminin 2022-ci ilə nisbətən 27% artırılaraq 10,7 milyon tondan 13,6 milyon tona çatdırılması da hədəflənir.

Eyni zamanda sərhəd-buraxılış məntəqələrində nəzarət gücləndiriləcək və qatarlara baxış vaxtı qısaldılacaq. Həmçinin “Azərbaycan Dəmir Yolları” QSC-nin lokomotiv parkının yenilənməsi nəzərdə tutulub.

Bundan başqa, Ələt−Osmanlı−Astara dəmir yolunun yenidən qurulması, Baş Ələt dəmiryol stansiyasının əsaslı təmiri, Bakı−Böyük Kəsik dəmiryol xəttinin elektrik təchizatı sisteminin yenidən qurulması ilə bağlı işlərin başa çatdırılması, Yevlax−Böyük Kəsik sahəsində 38 yoldəyişənin və 7 qəbul-göndərmə yolunun əsaslı təmiri planlaşdırılır.

Fəaliyyət Planına əsasən, Azərbaycan Gürcüstanla birlikdə gömrük nəzarətinin həyata keçirilməsi üçün yeni dövlət sərhədindən buraxılış məntəqələri inşa edəcək. Nəticədə tranzit daşımalar zamanı alternativ keçid imkanı yaradılacaq.

Sənəddə o da qeyd edilir ki, “Qırmızı Körpü” və “Mazımqara” dövlət sərhədindən buraxılış məntəqələrinin buraxılış qabiliyyəti artırılacaq. “Qırmızı Körpü” dövlət sərhədindən buraxılış məntəqələrinin yaxınlığında yerləşən mövcud terminalların infrastrukturu təmir ediləcək və gömrük postu yaxınlığında yeni gömrük terminalları inşa olunacaq.

Həmçinin Bakı Beynəlxalq Dəniz Ticarət Limanının ərazisində çeşidləmə məntəqəsində əlavə dörd dəmiryol xətti və konteyner terminalının tikintisi də planlaşdırılır ki, bunun nəticəsində yüklərin çeşidlənməsində operativlik təmin ediləcək.

Sənədə əsasən, Bakı Limanında və Hövsan Limanında da yeni infrastruktur yaradılacaq, zəruri avadanlıqlar alınacaq. Bakı Beynəlxalq Dəniz Ticarət Limanında və Dübəndi Terminalında dibdərinləşdirmə işləri aparılacaq.