Həbs olunan Fransa casusları arasında azərbaycanlı var | Qalmaqallı məqalə

Son günlər Azərbaycanda ifşa olunmuş Fransa casus şəbəkəsi ilə bağlı məsələlər aparıcı fransız mətbuat səhifələrinin geniş müzakirə mövzusuna çevrilib.

Hazırda həbsdə olan Martin Rayanın atası Fransa kəşfiyyat orqanı olan Xarici Təhlükəsizlik Baş İdarəsini kəskin ittiham edən müsahibələrlə çıxış edib. Bu barədə “Observer Online” yazır.

Aprelin 6-sı dərc olunmuş məqalədə qeyd edilir ki, Azərbaycanın təhlükəsizlik orqanının iş üzrə həbs etdiklərindən biri, Fransanın Azərbaycandakı diplomatik heyətinə yerləşdirilmiş kəşfiyyatçıları ilə əməkdaşlıq edən Məmmədli soyadlı Azərbaycan vətəndaşıdır.

O, Fransa vətəndaşlığının verilməsi və maddi təminatla mükafatlandırılma müqabilində, Fransa vətəndaşı Martin Rayanla birgə geniş gizli əlaqələr qurması, region üzrə zəruri informasiyaların toplanılıb ötürülməsi işinə cəlb edilməkdə ittiham olunur. Müvafiq yazışmalar artıq Fransanın xeyrinə yox, ziyanına işləməyə başlayıb.

Həmçinin məlum olur ki, hər 2 şəxs kəşfiyyat rəsmilərinin tapşırığı ilə dünyanın ən böyük bank şəbəkələrindən olan Fransanın nəhəng “Societe Jenerale” maliyyə şəbəkəsinin müxtəlif əməkdaşları ilə münasibətlər qurub. Məmmədli soyadlı şəxs Azərbaycan banklarında “Societe Jeneral”ın müxbir hesablarının açılması və banklararası müqavilələrinin tərtibində iştirak edib. Bu şəxsin hansı məqsədlə uzun müddətə Şimali İrlandiyaya göndərilməsinin səbəbləri isə açıqlanmayıb.

2023-cü il dekabrın 4-də qeyd olunan şəxslərin həbsindən və Fransa kəşfiyyat şəbəkəsinin ifşasından sonra “Societe Jenerale” Bankının Afrikanın 16 ölkəsində nümayəndəliklərinin fəaliyyətini dayandırması xüsusilə diqqət çəkən məqamdır.

Məsələ ondadır ki, 2017-ci ildən “Societe Jenerale” Bankının təhlükəsizlik üzrə direktoru, əvvəl isə Fransa Silahlı Qüvvələrində Kəşfiyyat və təhlükəsizlik idarəsinin rəhbəri, “ehtiyatda” olan general Antoine Creux-un tutduğu vəzifə uyğunsuzluğu ətrafında müzakirələr hazırkı hadisələrin üzə çıxmasına rəvac verib.