Fransa casuslarına Bakı barədə hansı tapşırıq verilib? - Məhkəmə prosesindən məlumat

Azərbaycanın Dövlət Təhlükəsizliyi Xidməti tərəfindən həbs edilən və Fransaya casusluqda ittiham olunan Martin Rayan və Azad Məmmədlinin cinayət işinin məhkəmə baxış iclası keçirilib.

Bakı Ağır Cinayətlər Məhkəməsinin hakimi Elmin Rüstəmovun sədrliyi ilə keçirilən açıq məhkəmə iclasında dövlət ittihamçısı təqsirləndirilən şəxslərə ittiham aktını elan edib. Prosesdə yerli və xarici media nümayəndələri, xarici səfirliklərin əməkdaşları iştirak ediblər.

Qeyd edək ki, ittihama əsasən, Martin Rayanın Azərbaycan Respublikasında istehsal edilən silah-sursatlar, 2020-ci ildə 44 günlük Vətən müharibəsi zamanı Azərbaycan Ordusunun komplektləşdirilməsi, Azərbaycan Silahlı Qüvvələrində hərbi xidmətdə olan və ya ehtiyata buraxılan, əlaqəyə cəlb edilməsi mümkün olan şəxslər, xaricdə fransız dilində təhsil alan şəxslər, eləcə də Azərbaycanda fəaliyyət göstərən xarici ölkə vətəndaşları və hüquqi şəxslərlə əlaqələri əsaslı şübhələr yaradıb.

Bundan başqa, Fransa xüsusi xidmət orqanının tapşırığı ilə Azərbaycan üzərindən digər ölkələrə gizli pul köçürülməsinin təşkili imkanları, Böyük Britaniya, Əlcəzair, Türkiyə, Pakistan, İran, Çin, Somali, Mərkəzi Asiya dövlətləri ilə Azərbaycan arasında münasibət və əlaqələr, hərbi əməkdaşlıq planları, Azərbaycana idxal olunan silah-sursat barədə məlumatların əldə edilməsinə dair tapşırıqlar almasına və bu istiqamətlərdə fəaliyyətinə əsaslı şübhələr müəyyən edilib.

Təqsirləndirilən Martin Rayan eyni zamanda bəzi xarici dövlətlərin Azərbaycandakı səfirliklərində işləyən şəxslərlə məqsədyönlü şəxsi münasibət qurub məlumatlar alaraq xarici xüsusi xidmət orqanına ötürməkdə şübhəli bilinir.

İttiham aktında qeyd olunub ki, təqsirləndirilən Martin Rayan Azad Məmmədlini Səbail rayonunda kirayə yaşadığı evdə və həmin ərazidə yerləşən restoranların birində Fransanın xüsusi xidmət orqanları əməkdaşları ilə görüşdürüb. O, Azad Məmmədliyə görəcəyi işlərin qarşılığında xarici vətəndaşlıq vəd edib.

Məhkəmə prosesində Martin Rayan özünü qismən təqsirli bilib. İş üzrə növbəti məhkəmə prosesi fevralın 19-na təyin edilib.