Heydər Əliyevin həyata keçirdiyi tarixi missiya | Baykal-Amur Magistralı - ARAŞDIRMA

Öz dövrünün ən nəhəng logistika layihəsi kimi ərsəyə gələn Baykal-Amur Magistralı insan fədakarlığının təcəssümü idi.

Coğrafi baxımdan ölkəmizdən xeyli uzaqlarda yerləşən bu dəmiryolu marşrutunun gerçəyə çevrilməsində azərbaycanlıların əməyi danılmazdır.

BAM-ın reallaşdırılmasında xüsusi xidmətləri olan bir azərbaycanlı da Ulu Öndər Heydər Əliyevdir.

Onunla çiyin-çiyinə çalışanlar etiraf edirlər ki, belə böyük bir layihənin öhdəsindən gəlmək və onu başa çatdırmaq Heydər Əliyevin iradəsi sayəsində mümkün idi. O nəinki magistralın problemləri ilə məşğul idi, hətta fəhlələrin nə ilə və necə qidalanmaları, evlərinin isti olub olmaması, uşaqlarının məktəbə rahat getməsi ilə də maraqlanırdı.

Qeyd edək ki, o zaman Heydər Əliyev həm də Sovet İttifaqının bütün növ nəqliyyat – hava nəqliyyatından tutmuş avtomobil nəqliyyatına qədər xalq istehlakı mallarına nəzarət və bütün sosial sahələrə rəhbərlik edirdi. Üstəlik, təqaüdçülərin problemləri, səhiyyə, elm, mədəniyyət və idman məsələləri də Heydər Əliyevin nəzarətində idi.

Maraqlı məqamlardan biri də odur ki, BAM da azərbaycanlılar iki qəsəbə inşa ediblər. Bunlar Anqoya və Ulkan adlı qəsəbələrdir. Buradakı memarlıq üslubu da Azərbaycanı xatırladır. Anqoyadakı dəmiryolu vağzalı 2008-ci ildən Ulu Öndər Heydər Əliyevin adını daşıyır.

Rusiyanın Şərqi ilə Qərbini birləşdirən, Sakit okean sahillərinə qədər uzanan strateji əhəmiyyətə malik olan magistral vacibliyini indi də qoruyub saxlayır. İllər keçəcək, Sibirin, uzaq Şərqin qoynundan keçən magistral yol öz aktuallığını itirməyəcək.

Heydər Əliyev imzası ilə gerçəkləşən bir çox layihələr kimi, bu unikal tikinti də insanlara və dövlətlərə xeyir, mənfəət və ümid bəxş edəcək.