İlham Əliyev “Azerbazalt” zavodunun təməlini qoyub | Səfərdən görüntülər

Prezident İlham Əliyev və birinci xanım Mehriban Əliyeva avqustun 20-də Gəncə şəhərində olublar.

Ulu Öndər Heydər Əliyevin şəhərin mərkəzində ucaldılan abidəsini ziyarət edərək önünə gül dəstələri qoyublar.

Dövlət başçısına və birinci xanıma şəhərdə aparılan tikinti-quruculuq işləri barədə məlumat verilib.

Bildirilib ki, III MDB Oyunlarına hazırlıq çərçivəsində Gəncə şəhərində bütün aidiyyəti qurumlar səfərbər olunub, genişmiqyaslı abadlıq-quruculuq, təmir-bərpa və tikinti işləri həyata keçirilir.

Avqustun 20-də Prezident İlham Əliyev və birinci xanım Mehriban Əliyeva Gəncə şəhərində “Azerbazalt” MMC-nin bazalt məhsulları istehsalı zavodunun təməlqoyma mərasimində iştirak ediblər.

“Azerbazalt” MMC-nin təsisçisi Rafət Əliyev dövlət başçısına və birinci xanıma müəssisə haqqında məlumat verib.

Bildirilib ki, burada bazalt tozu və onun əsasında orqanik gübrə istehsalı həyata keçiriləcək. Layihə iki mərhələdə icra olunacaq. Birinci mərhələnin investisiya dəyəri 27 milyon manat təşkil edəcək. Ümumi sahəsi 4 hektar olan müəssisədə illik 360 min ton orqanik gübrə istehsalı nəzərdə tutulur. İstehsalat prosesi İsveç və Türkiyə texnologiyaları əsasında qurulacaq, əsas xammal kimi Göygöl rayonunun “Çaykənd” yatağından çıxarılan yüksəkkeyfiyyətli bazaltdan istifadə olunacaq. Layihənin birinci mərhələsində 200 nəfər, ikinci mərhələsində isə 300 nəfər daimi işlə təmin ediləcək.

Bu müəssisənin yaradılması yerli resurslardan səmərəli istifadə edilməsinə, qeyri-neft sektorunun inkişafına, ixracyönümlü və rəqabətqabiliyyətli məhsulların istehsalına töhfə verəcək.