İlham Əliyev Gəncəyə səfər edib

Prezident İlham Əliyev Gəncə şəhərində səfərdə olub.

Dövlət başçısı ümummilli lider Heydər Əliyevin Gəncə şəhərinin mərkəzində ucaldılmış abidəsini ziyarət edib, önünə gül dəstəsi qoyub.

Prezident Gəncədə Ekoloji Park Kompleksinin tikintisi ilə tanış olub. Dövlət başçısına məlumat verilib ki, Qərb bölgəsində ilk dəfə Gəncəndə salınan Ekoloji Park Kompleksinin tikintisinə və onun ətrafında abadlıq işlərinə 2021-ci ilin dekabrında başlanılıb. Gəncəçay çayının sağ sahilində yerləşən kompleks 11 hektar ərazini əhatə edir.

Unikallığı ilə seçiləcək kompleksdə insanların rahatlığı və asudə vaxtlarını daha səmərəli keçirmələri üçün bütün lazımi şərait yaradılır. Ekoloji Park Kompleksinin ərazisində əyləncə mərkəzlərinin, idman qurğularının, iaşə obyektlərinin yaradılması da planlaşdırılıb.

Prezident İlham Əliyev Gəncə İdman Sarayının açılışında da iştirak edib. Dövlət başçısının müvafiq sərəncamına əsasən, inşa edilən Gəncə İdman Sarayının tikintisinə 2018-ci ilin iyununda başlanılıb.

Yüksək keyfiyyətlə aparılan tikinti işləri bu ilin martında tam başa çatdırılıb. Ümumi sahəsi 40 min kvadratmetrə yaxın olan İdman Sarayında bütün zəruri infrastruktur yaradılıb.

Daha sonra Prezident İlham Əliyev Gəncə şəhər stadionunun təməlini qoyub. Bildirilib ki, 1964-cü ildə istismara verilən stadionun tamaşaçı tribunaları yararsız vəziyyətə düşdüyündən və texniki cəhətdən istismarı mümkün olmadığından fəaliyyəti qismən həyata keçirilirdi. Stadionun ərazisində köməkçi məşq meydançaları və futbol akademiyası binası tikilib.

Prezidentin müvafiq sərəncamına əsasən, Gəncə şəhər stadionunun yenidən qurulması işlərinin layihələndirilməsi və həyata keçirilməsi üçün ilkin olaraq bir milyon manat ayrılıb.

Stadionun layihələndirmə işləri artıq başa çatdırılıb. Yenidənqurma işləri çərçivəsində stadionun ərazisi genişləndirilərək 10 hektara çatdırılacaq.