Paşinyan iddialarından nə vaxt əl çəkəcək? | Sülh prosesində qəbuledilməz yanaşma

Prezident İlham Əliyev “Rossiya Seqodnya” Beynəlxalq İnformasiya Agentliyinin Baş direktoru Dmitri Kiselyova müsahibəsində Azərbaycan-Ermənistan arasında imzalanacaq sülh müqaviləsində hələ də razılaşdırılmayan bəndlərdən bəhs edib.

Prezidentin açıqlamasından sonra Nikol Paşinyan qeyd olunan məqamları şərh edib.

Xatırlatma üçün bildirək ki, Azərbaycan Prezidenti sülh müqaviləsinin hələ razılaşdırılmamış iki önəmli müddəasını açıqlayıb. Bunlardan biri qarşılıqlı beynəlxalq iddiaları kənara qoymaq, digəri isə başqa ölkələrin nümayəndələrini sərhədimizdə yerləşdirməməkdir.

Ermənistan Baş naziri birinci məsələ ilə bağlı belə deyir:

“Beynəlxalq məhkəmələrdə bir-birinə qarşı irəli sürülmüş iddiaların geri çəkilməsinə gəldikdə sülh müqaviləsi imzalananda bu, məntiqli görünür və buna görə də ideya bizim üçün qəbul olunandır”.

Siyasi şərhçilər isə hesab edirlər ki, Baş nazirin bu açıqlamaları manipulyativ xarakter daşıyır.

“Nikol Paşinyan bildirir ki, bu iddialar sülh müqaviləsi imzalandıqdan sonra geri çəkilə bilər. Bu da qəbuledilməzdir. Ən azı o baxımdan ki, Ermənistan faktiki olaraq bu davranışlarla sülh prosesini gecikdirmək və sürətli silahlanmanı həyata keçirməyi çalışır. Bu da göz önündədir.

Belə ki, Ermənistan adi prosedurları, çox qısa zaman tələb edən cavabları belə uzun zaman gecikdirməklə məşğul olub. Biz çox yaxşı xatırlayırıq ki, son sülh müqaviləsi üzrə təkliflərin verilməsi 70 gündən artıq zaman almışdı”, – siyasi şərhçi Oqtay Qasımov mövzu ilə bağlı Baku TV-yə açıqlamasında bildirib.