İlham Əliyev Türkiyəyə hərbi təyyarə qəzası ilə bağlı başsağlığı verdi

Prezident İlham Əliyev Türkiyəyə məxsus hərbi yük təyyarəsinin Gürcüstan ərazisində qəzaya uğraması ilə əlaqədar Türkiyə Prezidenti Rəcəb Tayyib Ərdoğana başsağlığı verib.

"Əziz Qardaşım. Gəncədən qalxan və Türkiyə Hərbi Hava Qüvvələrinə məxsus hərbi yük təyyarəsinin Gürcüstan ərazisində qəzaya uğraması nəticəsində hərbçilərin həlak olması barədə xəbər bizi son dərəcə sarsıtdı.

Bu ağır anlarda kədərinizi bölüşür, baş vermiş faciə ilə əlaqədar sizə, həlak olanların ailələrinə və yaxınlarına, qardaş Türkiyə xalqına öz adımdan və Azərbaycan xalqı adından dərin hüznlə başsağlığı verirəm. Allah rəhmət etsin!", – deyə başsağlığında bildirilib.

Qeyd edək ki, Türkiyə Hərbi Hava Qüvvələrinə məxsus "C130" yük təyyarəsi Gürcüstanda qəzaya uğrayıb. Türkiyə kütləvi informasiya vasitələrinin məlumatına görə, axtarış-xilasetmə işləri aparılır və bu, Gürcüstanın müvafiq orqanları ilə birgə həyata keçirilir. Təyyarənin qəza anında 8 kilometr hündürlükdə uçduğu bildirilir. Gürcüstanda təyyarə qəzası ilə bağlı cinayət işi açılıb.