İlham Əliyev və Mehriban Əliyeva Cəbrayıl rayonuna səfər ediblər

Prezident İlham Əliyev və birinci xanım Mehriban Əliyeva oktyabrın 3-də Cəbrayıl rayonuna səfər edib.

Dövlət başçısı və birinci xanım Horovlu kəndində fərdi evlərin və sosial obyektlərin tikintisi ilə tanış olublar.

Prezident İlham Əliyev və birinci xanım Mehriban Əliyeva həmçinin Mehdi Mehdizadə adına 960 şagird yerlik tam orta məktəb binasının açılışında da iştirak ediblər.

Dövlət başçısı “Azərsun Holdinq” MMC-nin alkoqolsuz içki məhsulları istehsalı kompleksinin və Soltanlı kəndində “Hicaz quşçuluq” müəssisəsinin damazlıq yumurta istehsalı fabrikinin təməlini qoyub.

Həmçinin Prezident İlham Əliyev və birinci xanım Mehriban Əliyeva Cəbrayıl rayonunda “Araz Vadisi İqtisadi Zonası” Sənaye Parkında Litvanın “Dominari” şirkətinin mebel klasterinin, “Karabakh Stone” MMC-nin zavodunun və “Prestij-Kimya” MMC-nin zavodunun təməlqoyma mərasimlərində iştirak ediblər.