İran Ermənistan sərhədində azad iqtisadi zona yaradıla bilər? - Baku TV

İran Ermənistanla münasibətləri xüsusilə iqtisadi və konsulluq sahələrində dərinləşdirməyə çalışır. İranın xarici işlər naziri Abbas Əraqçi Qafana yeni təyin olunmuş baş konsul Davud Yaycı ilə görüşündə əlaqələrin inkişaf etdirilməsinin vacibliyini vurğulayıb.

Bundan əvvəl isə İran Ermənistanla iki ölkənin sərhədi yaxınlığında birgə azad iqtisadi zona yaratmağı təklif edib. Təklif “Araz” Azad İqtisadi Zonasının İdarə Heyətinin sədri Hadi Müqəddəmzadə tərəfindən İrəvanda keçirilən “Armenia Expo 2026” sərgisində səsləndirilib.

Siyasi şərhçi Elnur Ənvəroğlu İran-Ermənistan münasibətlərində müşahidə olunan yumşalmanı şərh edib:

“Son zamanlar İranın siyasətində ritorikadan müəyyən qədər yumşaq mövqeyə keçid müşahidə olunur. Bunun əsas səbəblərindən biri İranın regionda, xüsusilə ABŞ və Körfəz ölkələri ilə münasibətlər fonunda təklənməsidir”.

Onun sözlərinə görə, Tehran bu səbəbdən şimal qonşularına, xüsusilə Cənubi Qafqaza daha çox maraq göstərməyə başlayıb:

“Burada əsas məsələlərdən biri TRIPP layihəsidir. Ermənistan ərazisində ABŞ-nin iştirakı və dominantlıq əldə etməsi İranı narahat edir. Tehran qarşısında iki seçim görür: ya layihəyə qarşı müqavimət göstərmək, ya da onunla barışaraq müəyyən şəkildə prosesin bir hissəsinə çevrilmək. İran hazırkı vəziyyətdə ikinci varianta üstünlük verməyə başlayıb”.

Ekspert hesab edir ki, İranın Ermənistanla iqtisadi əlaqələri genişləndirmək, o cümlədən sərhədyanı azad iqtisadi zona yaratmaq təklifi də bu siyasətin tərkib hissəsidir:

“İran gələcəkdə reallaşacaq TRIPP layihəsinin bir hissəsində iştirakçı kimi görünmək istəyir. Çünki Ermənistan üzərindən keçən marşrutlar Tehran üçün strateji əhəmiyyət daşıyır”.