İrəvan razılıq versəydi... | Rusiyanın Ermənistandakı səfiri Aİ-nin missiyasını ifşa etdi

"Avropa İttifaqı missiyası Ermənistanı qorumur, onlar burada region ölkələrinə qarşı mübarizə aparmaq üçün kəşfiyyat məlumatları toplamaqla məşğuldurlar".

Bu sözləri Rusiyanın Ermənistandakı səfiri Sergey Kopırkin ölkə mediasına açıqlamasında bildirib.

“Əgər 2022-ci ilin sentyabrında İrəvan Kollektiv Təhlükəsizlik Müqaviləsi Təşkilatı vasitəsilə Azərbaycanla sərhəddə vəziyyətin sabitləşdirilməsi üçün tədbirlərin həyata keçirilməsi təklifinə razılıq versəydi, bu gün Ermənistanın üzləşdiyi problemlərin bir çoxu azaldıla bilərdi.

Söhbət hərbi-texniki yardımdan, bölgəyə monitorinq missiyasının göndərilməsindən, sərhəd qoşunlarının hazırlanmasına göstərilən köməkdən gedir. Lakin onlar monitorinq adı ilə Azərbaycan, İran və Rusiyaya qarşı kəşfiyyat məlumatları toplayırlar”, – deyə o vurğulayıb.

Səfir qeyd edib ki, Cənubi Qafqazın taleyini yalnız region ölkələri və qonşu tərəfdaş dövlətlər müəyyən etməlidir.