Jurnalistin Türkiyədən qovulmasında kimin əli var? | Sensasiyalı iddia

Türkiyə hökuməti bu məsələ ilə bağlı hələlik rəsmi açıqlama verməyib. Lakin analitiklər Nil Hauerin Türkiyənin və Azərbaycanın milli maraqlarına zidd mövqelər sərgilədiyini və buna görə “arzuolunmaz şəxs” elan olunmuş ola biləcəyini ehtimal edirlər.

Bu qərar iki ölkənin regional təhlükəsizlik və milli maraqlara önəm verdiyini bir daha nümayiş etdirir. Nil Hauer giriş qadağasının onun jurnalist fəaliyyəti ilə əlaqəli olduğunu ehtimal edir. O bu qərarın Türkiyə hökuməti tərəfindən Azərbaycan tərəfinin tələbi ilə verildiyindən şübhələndiyini bildirib.

Jurnalist açıqlamasında qeyd edib ki, indiyədək Türkiyə haqqında nadir hallarda yazıb, lakin bu qərarın onun peşəkar fəaliyyətinə görə qəbul edildiyinə inanır. Nil Hauer jurnalist fəaliyyəti dövründə tez-tez Azərbaycan və Türkiyəyə qarşı tənqidi mövqedə olub.

O xüsusilə Qarabağ müharibəsi zamanı Azərbaycanın hərbi əməliyyatlarını tənqid edib və Ermənistanın mövqeyini müdafiə edən materiallar yayımlayıb. Bundan başqa, Türkiyənin regional siyasəti barədə də qərəzli yanaşmalar sərgiləyib. N.Hauer Türkiyə və Azərbaycanın sıx əməkdaşlığına qarşı çıxış edən bir neçə məqalə dərc edib.

Kanadalı jurnalist və analitik Nil Hauer 23 noyabrda Türkiyəyə girişinin qadağan edildiyini açıqlayıb. Jurnalist İrəvandan İstanbula turist vizası ilə gəlmək istəsə də, hava limanında 16 saat saxlanıldığını və daha sonra geri deportasiya edildiyini bildirib. N.Hauer bu qərarın səbəbləri barədə Türkiyə rəsmilərindən heç bir ətraflı məlumat almadığını qeyd edib.