Makronun casuslarından birinin kimliyi məlum oldu

Fransanın Azərbaycanda apardığı casusluq fəaliyyətinə görə həbs olunanlardan birinin şəxsiyyəti məlum olub.

Bu barədə erməniəsilli fransız jurnalist Leo Nikoliyan özünün rəsmi sosial media hesabında məlumat verib.

Bildirib ki, həmin şəxs Merkorama MMC-nin baş direktoru Martin Ryandır və o, Azərbaycana qarşı casusluqda ittiham olunaraq Bakıda həbs olunub. Onun sözlərinə görə, M.Ryan onu məxfi əməkdaşlığa məcbur edən, sonradan Bakıdan qovulmuş Fransanın Xarici Kəşfiyyat Baş İdarəsi agenti tərəfindən istifadə edilib.

Qeyd edək ki, daha əvvəl Qərb mətbuatında yayılan məlumatlara əsasən, Dövlət Təhlükəsizliyi Xidmətinin 2023-cü il dekabrında apardığı araşdırmalarla Ukrayna, Moldova, Gürcüstan, Azərbaycan, Şərqi Avropa, Yaxın Şərq və Mərkəzi Asiyanın bir sıra ölkələrində müxtəlif əməliyyatlara cəlb edilən Fransa xüsusi xidmət orqanlarının geniş agentura şəbəkəsi Azərbaycanda ifşa olunub.

Qısa müddət ərzində həm Azərbaycanda xidmət edən, həm də müxtəlif ölkələrdə və nüfuzlu beynəlxalq təşkilatlarda örtülü işi davam etdirən onlarla Fransa xəfiyyəsi aşkarlanıb. Azərbaycan tərəfi isə qeyd olunan həbslərlə bağlı hələ ki, rəsmi açıqlama verməyib.

Qeyd edək ki, Fransa Prezidenti Emmanuel Makron 2023-cü il dekabrın 20-də Fransa Xarici Təhlükəsizlik Baş İdarəsinin rəisi Bernar Emyeni vəzifəsindən azad edib. Onun sərəncamı ilə Daxili Təhlükəsizlik Baş İdarəsinə rəhbərlik etmiş Nikolas Lerner isə Xarici Kəşfiyyat strukturuna yeni rəhbər təyin edilib.