MM-də dövlət sərhədlərinin bağlı olması ilə bağlı nələr açıqlandı?

Azərbaycanın quru sərhədlərinin bağlı qalması dövlətin strateji maraqlarını təmin etmək məqsədi daşıyır.

Bunu Milli Məclisin deputatı Rizvan Nəbiyev parlamentin növbədənkənar sessiyasının iyunun 24-də keçirilən plenar iclasında deyib.

“Ermənistanın işğalına son qoyulsa da, sərhədlərin delimitasiya və demarkasiyası üzrə dövlət komissiyası fəaliyyətdə olsa da, şərti sərhəddə gərginlik tam aradan qalxmayıb.

Nəzərə almaq lazımdır ki, Ermənistanın təcavüzünə görə təxminən 700 kilometrlik sərhədimiz bu dövlətlə, 132 kilometrlik dövlət sərhədimiz isə cənubda İranla 30 il ərzində işğal altında olub. İşğala və onun nəticələrinə görə Azərbaycanın dövlət orqanları bu ərazilərdə öz yurisdiksiyasını icra edə bilməyib.

Həmçinin qaçaqmalçılıq, narkotik ticarəti, qeyri-qanuni miqrasiya, kütləvi qaçqın axını təhlükəsi kimi faktorlar da sərhədlərin bağlı saxlanmasını zəruri edən şərtlərdəndir”, – o qeyd edib.