Moskvada tarixi görüş | Putin və Pezeşkian nələri müzakirə etdi?

"Regionda meydana gələn istənilən problemin həlli, əlbəttə yalnız region ölkələrinin özləri tərəfindən həyata keçirilməlidir".

Bu sözləri İran Prezidenti Məsud Pezeşkian Moskvada rusiyalı həmkarı Vladimir Putinlə görüşü zamanı bildirib.

O vurğulayıb ki, kənar qüvvələr regionda sabitliyi pozurlar. Dövlət başçısı həmçinin Rusiya ilə əlaqələrdən də danışıb.

"Moskva ilə ikitərəfli münasibətlərimiz strateji əhəmiyyətə malikdir. İran bu sıx dialoqu qorumaq niyyətindədir", – deyə lider bəyan edib.

Məlumata görə, görüşün yekununda tərəflər Rusiya və İran arasında hərtərəfli strateji tərəfdaşlıq haqqında saziş imzalayıblar. Görüşdə müzakirə olunan mövzular arasında 2 ölkə arasında münasibətlər, eləcə də Yaxın Şərqdəki vəziyyət, Cənubi Qafqazdakı proseslər və İranın nüvə proqramı olub.

Rusiya Prezidenti Vladimir Putin həm ölkəsinin, həm də rəsmi Tehranın Cənubi Qafqazda sülhün tərəfdarı olduğunu vurğulayıb.

Qeyd edək ki, İran tərəfinin regiondakı kənar qüvvələrdən narahatlığı Avropa İttifaqının Ermənistandakı missiyasının fəaliyyəti ilə əlaqədardır. Çünki Tehran regional məsələlərin İran, Rusiya, Türkiyə, Ermənistan və Azərbaycandan ibarət "3+3" formatında müzakirə olunmasının tərəfdarıdır.