Paşinyan üzərindəki öhdəliklərdən boyun qaçırır | Ekspertlərdən vacib açıqlama

“2020-ci il 10 noyabr tarixində Azərbaycan, Rusiya və Ermənistan liderləri arasında imzalanmış bəyanatın 9-cu bəndinin reallaşdırılması istiqamətində İrəvan ikiüzlü mövqe nümayiş etdirir”.

Bu sözləri Xəzər Strateji Araşdırmalar İnstitutunun baş direktoru İqor Korotçenko Ermənistanın Baş naziri Nikol Paşinyanın “Sülh qovşağı” konfransından öncə səsləndirdiyi “Zəngəzur dəhlizindən keçən yola nəzarəti ancaq Ermənistan tərəfi həyata keçirə bilər”, bu yaxınlarda isə Rusiya Prezidenti Vladimir Putinlə ikitərəfli görüşdən sonra isə fikrini dəyişərək “Nəqliyyat yoluna nəzarət Rusiyanın Federal Təhlükəsizlik Xidmətinə verilə bilər” sözlərini şərh edərkən deyib.

Qeyd edib ki, N.Paşinyanın sonuncu açıqlaması onu deməyə əsas verir ki, o, Zəngəzur dəhlizi məsələsində geri addım atmaq qərarına gəlib.

Xəzər Strateji Araşdırmalar İnstitutunun baş direktoru İqor Korotçenko bildirib ki, son illər ərzində Nikol Paşinyan dəfələrlə açıq şəkildə bəyan edib ki, Naxçıvan Muxtar Respublikası ilə Azərbaycan arasında Zəngəzur nəqliyyat dəhlizinin açılması ilə bağlı üzərinə götürdüyü öhdəlikləri, yəni bu dəhlizdə yüklərin daşınmasına nəzarətin Rusiya FTX-nin sərhəd xidməti tərəfindən həyata keçirilməsi ilə bağlı razılığı yerinə yetirməyəcək:

“Razılaşmaya əsasən, sözügedən dəhlizdə nə Ermənistan hakimiyyətinin nümayəndələri, nə sərhədçilər, nə də gömrükçülər olmalıdır.

Nikol Paşinyanın isə sonuncu açıqlamasından belə görünür ki, o, əvvəlki mövqeyindən geri çəkilib. Amma onun dediklərini ciddi qəbul edib, Ermənistanın üçtərəfli bəyanatdan irəli gələn öhdəliklərini yerinə yetirəcəyinə ümid bağlamaq olmaz. Çünki Ermənistan Zəngəzur dəhlizini açmaq niyyətində deyil, onun yerinə İrəvanın hazırkı tərəfdaşları olan amerikalıların və fransızların təsdiqlədiyi “dünyanın kəsişməsi” konsepsiyasını təklif edir”.