Paşinyanın anti-Rusiya siyasətinin səbəbləri | Ermənistanı nə gözləyir?

Son vaxtlar Rusiya və Ermənistan arasında bir-birilərinə yönəlik siyasi ittihamların dərinləşdiyini müşahidə etməkdəyik.

Rusiya tərəfi Ermənistana NATO sammitində iştirakına dair xəbərdarlıqlar edir, eləcə də Avropa İttifaqının missiyasının İrəvandakı fəaliyyəti ilə bağlı narahatlığını dilə gətirir.

Ermənistan isə ikitərəfli münasibətlər çərçivəsində rəsmi Moskvaya ünvanlanan bəzi sualların açıq qaldığını bildirir və təhlükəsizlik sistemi ilə bağlı bütün məsələlərin Ermənistan hakimiyyəti tərəfindən həll olunduğunu qeyd edir.

Ekspertlər bildirirlər ki, bir-birinin ziddi olan belə intensiv siyasi təmaslar regionda Ermənistanın əleyhinə ciddi problemlər yaradacaq.

“Bildiyimiz kimi, gələn ayın 1-dən Zvartnots hava limanından Rusiya sərhədçilərinin çıxarılması, eyni zamanda Ermənistanın KTMT-dən uzaqlaşması, növbəti mərhələ kimi 102-ci bazanın Ermənistandan çıxarılması ilə bağlı artıq fikirlər dolaşmaqdadır. Rusiya da bunu görür, təhlükəni hiss edir.

Ümumiyyətlə, bölgəyə aid olmayan dövlətlər var ki, Ermənistan vasitəsilə öz hərbi mövcudluğunu Cənubi Qafqazda yaratmağa çalışırlar. Belə təhlükəli gedişlər Ermənistan üçün gələcəkdə yaxşı nəticələr verməyəcək. Rusiyanın Ermənistana cavabı çox sərt olacaq. Bundan da Ermənistan və onun hərbi-siyasi havadarları məsuliyyət daşıyacaq”, – deyə hərbi ekspert Azər Bayramov qeyd edib.