Prezident COP29-la bağlı mühüm sərəncam imzaladı

Prezident İlham Əliyev BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının, Kioto Protokolunun Tərəflər Görüşünün 19-cu sessiyasının və Paris Sazişinin Tərəflər Görüşünün 6-cı sessiyasının keçirilməsi ilə əlaqədar Təşkilat Komitəsinin yaradılması haqqında Sərəncam imzalayıb.

Sərəncama əsasən, COP29, Kioto Protokolunun Tərəflər Görüşünün 19-cu sessiyasının və Paris Sazişinin Tərəflər Görüşünün 6-cı sessiyasının 2024-cü ildə Bakı şəhərində təşkili və keçirilməsi təmin edilməlidir.

Prezident Administrasiyasının rəhbəri Samir Nuriyev Təşkilat Komitəsinin sədri, digər rəsmi şəxslərdən, nazirlərdən və dövlət qurumlarının rəhbərlərindən ibarət daha 27 nəfər isə Təşkilat Komitəsinin üzvləri təyin ediliblər.

Təşkilat Komitəsinə COP29-un, Kioto Protokolunun Tərəflər Görüşünün 19-cu sessiyasının və Paris Sazişinin Tərəflər Görüşünün 6-cı sessiyasının təşkili və keçirilməsi ilə bağlı Tədbirlər Planını hazırlayıb həyata keçirmək tapşırılıb. Təşkilat Komitəsi həmçinin əməliyyat şirkətinin yaradılması ilə əlaqədar tədbirlər görməlidir.