Qərb Rusiya-Ukrayna müharibəsində istədiyinə nail oldu? | Politoloqdan açıqlama
Rusiya-Ukrayna müharibəsinin 2 ildir davam etməsinə baxmayaraq, Qərbin Ukraynaya kifayət qədər dəstək vermədiyi üzə çıxıb.
Başqa sözlə, “xilaskarlıq” missiyası özünü doğrultmayıb. Hətta aylardır Kiyevə vəd edilən yardım paketi Amerika Birləşmiş Ştatlarının Konqresi tərəfindən təsdiqlənmir.
Bəs Vaşinqtonun özünə müttəfiq hesab etdiyi ölkələrə münasibəti və dəstəyi, əslində, necə olur?
Birləşmiş Ştatlar Böyük Britaniya ilə birgə bütün gücünü səfərbər edərək İranın atdığı raketləri heç İsrailə çatmamış, havada zərərsizləşdirib. Bu, bir daha göstərir ki, ABŞ müttəfiq kimi gördüyü ölkələri haqlı olub-olmamasına baxmayaraq, istənilən münaqişə şəraitində belə dəstəkləyir, şəxsi maraq güddüyü ölkələri isə öz taleyi ilə baş-başa buraxır.
Görünən odur ki, Birləşmiş Ştatlar İran-İsrail gərginliyindən fərqli olaraq Rusiya-Ukrayna cəbhəsində müharibənin tezliklə bitməsində maraqlı deyil. Çünki münaqişənin davam etməsi Rusiyanın daha da zəifləməsi ilə yanaşı, Qərbin də Ukrayna faciəsi üzərindən maraqlarının daha çox təmin edilməsinə gətirib çıxara bilər.
Bir sözlə, demokratiya və insan hüquqları kimi ali dəyərlər Qərbə şəxsi mənafeyini təmin etmək üçün lazımdır. Hətta yeni maraqlar ortaya çıxarsa, o zaman elə həmin dəyərləri belə məhv etmək lazım gəlir. Bu isə Qərbin nə qədər riyakar siyasət həyata keçirdiyini bir daha nümayiş etdirir.