Qırğızıstan vətəndaşları İrandan Azərbaycana təxliyə edildi

Qırğızıstan Respublikasının İrandakı səfirliyinin nümayəndələri Astara sərhəd-gömrük məntəqəsindən Azərbaycan ərazisi vasitəsilə təxliyə olunublar.

Təxliyə edilən şəxslərə tibbi xidmət göstərilməsi üçün şərait yaradılıb, onlara səhər süfrəsi açılıb.

Qırğızıstanın İrandakı səfirliyinin əməkdaşı Nazim Beişekeev Azərbaycan hökumətinə Qırğızıstan vətəndaşlarının Astara sərhəd-keçid məntəqəsindən evakuasiyasının təşkilində göstərdiyi dəstəyə və qonaqpərvərliyə, yaradılan şəraitə görə təşəkkür edib:

“Gələcəkdə məhsuldar əməkdaşlıq edəcəyimizə ümid edirik. Evakuasiya yaxşı, təhlükəsiz keçdi, 7-8 saata bu məntəqəyə çatdıq. İranda vəziyyət, həqiqətən, gərgindir. Ümidvaram ki, hər iki tərəf arasında müəyyən diplomatik danışıqlar nəticəsində vəziyyət sabitləşəcək. Mən fikirləşirəm ki, həmişə belə böhranlar qarşılıqlı şəkildə həll olmalıdır. Güc nümayişi xoşagələn hal deyil”.

Qeyd edək ki, bəzi xarici ölkələr Azərbaycan hökumətinə müraciət edərək İranda olan vətəndaşlarının təxliyəsi üçün Azərbaycanın ərazisindən tranzit keçid şəraitində öz ölkələrinə qayıtmasına yardım göstərilməsini xahiş edib.