"Bəziləri bundan narazıdır, amma..." | Prezident növbəti illər üçün hədəflərdən danışdı - Baku TV

“Velosiped zolaqlarının yaradılmasına başlanılıb. Bu, həm sağlamlıq, həm də tıxacların azaldılması baxımından vacib addımdır”.

Bu fikirləri Prezident İlham Əliyev yerli televiziya kanallarına müsahibəsində səsləndirib.

Dövlət başçısı bildirib ki, Bakıda tıxac probleminin həlli üçün əsas prioritetlərdən biri ictimai nəqliyyatın inkişafıdır:

“Hər il Bakıya yüzlərlə yeni avtobus gətirilir, havanı çirkləndirməyən elektrobusların sayı artır və bu proses həm dövlət, həm də özəl sektor tərəfindən davam etdiriləcək”.

Prezident qeyd edib ki, dəmir yolu və yol infrastrukturu da mühüm rol oynayır.

Onun sözlərinə görə, Bakı – Sumqayıt dəmir yolunun fəaliyyəti, tunel və körpülərin inşası şəhərdaxili nəqliyyatın yükünü əhəmiyyətli dərəcədə azaldıb.

Dövlət başçısı vurğulayıb ki, bu istiqamətdə proqram qəbul edilib, vəsait ayrılıb və qarşıdakı beş il ərzində əsas nəqliyyat problemlərinin mərhələli şəkildə həll olunması nəzərdə tutulur.