"Euronews"da Qlobal Bakı Forumuna həsr olunmuş xüsusi videosüjet yayımlandı

“Euronews” telekanalının “Focus” verilişində Bakıda keçirilən XII Qlobal Bakı Forumuna həsr olunan reportaj yayımlanıb.

Kanalın rəsmi portalında dərc edilən reportajda “Dünya düzəninin yenidən düşünülməsi: Çağırışların fürsətə çevrilməsi” şüarı ilə keçirilən bu nüfuzlu tədbirin qlobal çağırışların dəyərləndirilməsi üçün geniş imkanlar açdığı, məhz bu məqsədlə iştirakçı ölkələrin siyasi xadimlərini və səlahiyyətli şəxslərini görüşdürdüyü vurğulanıb.

Videomaterialda forumun müzakirə mövzuları da dəyərləndirilib.

Qeyd olunub ki, iştirakçılar Cənubi Qafqazda təhlükəsizlik, Avropa İttifaqının genişləndirilməsi, iştirakçı ölkələr arasında yeni əməkdaşlıq imkanları və digər məsələlərlə bağlı geniş fakir mübadiləsi aparıblar.

Telekanal həmçinin Azərbaycan Prezidenti İlham Əliyevlə müsahibənin kadrlarını təqdim edib ki, burada Azərbaycan lideri Cənubi Qafqaz təhlükəsizlik mexanizminin yaradılmasının vacibliyini vurğulayıb.

“Əlbəttə, ətrafımızda baş verən böhranlardan regionumuzun qorunması vacib məsələdir. Təəssüflər ki, onilliklər ərzində Cənubi Qafqaz qarşıdurma və düşmənçilik bölgəsi olub. Hazırda nisbətən sakit dövrdəyik və biz diqqətimizi buna yönəltməliyik. Biz növbəti hərbi qarşıdurmanı istisna edəcək əhatəli təhlükəsizlik mexanizmləri yaratmalıyıq və sovet dövründə olduğu kimi qonşuluq şəraitində yaşamağa çalışmalıyıq”, ‒ deyə telekanal Azərbaycan Prezidenti İlham Əliyevlə müsahibədən bir parçanı təqdim edib.