"Euronews"un reportajında Prezident İlham Əliyevin müsahibəsi yer aldı

İyunun 21-də “Euronews” televiziyasında Bakı Ekspo Mərkəzində Bakı Enerji Həftəsi çərçivəsində keçirilən 29-cu Beynəlxalq Xəzər Neft və Qaz və 12-ci Xəzər Beynəlxalq Energetika və Yaşıl Enerji sərgilərindən reportaj yayımlanıb.

Reportajda Azərbaycan Prezidenti İlham Əliyevin “Euronews”a müsahibəsi də yer alıb.

Müsahibə zamanı Prezident İlham Əliyev bildirib ki, “Masdar” Azərbaycanın yaşıl gündəliyini nümayiş etdirir. Bu, ondan xəbər verir ki, Azərbaycan nəinki ənənəvi enerji mənbələrinə, o cümlədən bərpaolunan enerjiyə sərmayə yatıranlar üçün cəlbedicidir.

Dövlət başçısı vurğulayıb ki, Azərbaycan COP29-a ev sahibliyi edəcək ölkə kimi yaşıl enerjiyə keçid prosesində öndə olmağı hədəfləyib.

İlham Əliyev bərpaolunan enerjiyə keçidlə bağlı qarşıya çıxan çətinliklərdən də söz açıb. Dövlət başçısı bildirib ki, bu, milli enerji şəbəkəsi ilə bağlıdır, çünki biz onu gücləndirməliyik ki, sərmayədarların verdiyi mümkün qədər çox enerjini qəbul edə bilsin.

İlham Əliyev 2024-cü ilin “Yaşıl dünya naminə həmrəylik ili” elan edilməsindən də bəhs edib. Vurğulayıb ki, ev sahibliyi edən ölkə kimi bizim əsas məqsədlərimizdən biri birliyi və həmrəyliyi yaratmaqdır.