"Hüquq savaşı"nda Azərbaycan qalib gəldi: Fransa BMT-də uduzdu

Birləşmiş Millətlər Təşkilatının Təhlükəsizlik Şurasında Ermənistanın Fransanın dəstəyi ilə çağırdığı növbəti iclasın nəticəsi yenə suya düşdü. Ölkəmiz əleyhinə heç bir qətnamə qəbul edilmədi.

Aparılan müzakirələr bir daha göstərdi ki, Ermənistan havadarlarının vədlərinə aldanıb təxribatçı əməllərini davam etdirsə də, beynəlxalq hüquq haqlı və ədalətli davranışa əsaslanan Azərbaycanın tərəfindədir. Elə bunun nəticəsidir ki, iclas Azərbaycanın növbəti diplomatik qələbəsi, Ermənistan və havadarlarının fiaskosu kimi yadda qaldı.

Azərbaycan Ermənistandan fərqli olaraq beynəlxalq hüququn norma və prinsiplərinə uyğun davranır. Məhz bu baxımdan rəsmi İrəvanın havadarlarının dəstəyi ilə Bakı əleyhinə qaldırdığı bütün vəsatətlər beynəlxalq təşkilatlar tərəfindən rədd edilir. Çünki BMT Təhlükəsizlik Şurasında hansısa qətnamə və ya bəyanat iki yolla qəbul edilə bilər: ya Şuranın daimi üzvlərinin yekdil qərarı ilə, ya da qeyri-daimi 10 üzvdən 9-nun səsini qazanmaqla. Amma bu zaman 5 daimi üzvdən heç biri veto hüququndan istifadə etməməlidir. Bu baxımdan gedişata Şurada Azərbaycanın mövqeyini dəstəkləyən ölkələr və daxili nizamnamə nöqteyi-nəzərindən baxanda Parisin təqdim etdiyi qətnamənin qəbulu son iki müzakirələrdə olduğu kimi, bu dəfə də müşkül görünürdü ki, nəticədə belə də oldu.

Azərbaycan diplomatiyası bütün imkanlarından istifadə edərək Fransanı məhz onun öz meydanında rüsvayçı məğlubiyyətə uğratdı. Ölkəmiz suverenliyini bərpa etməkdə haqlı olduğunu və ədalətli mövqeyini bütün dünyaya bir daha nümayiş etdirdi.