Rəsmi Bakıdan Fransaya tələb | Azərbaycanın daxili işlərinə qarışmayın

Martın 20-də Fransanın Baş naziri Qabriel Attal Fransanın Erməni Təşkilatlarının Əlaqələndirmə Şurasının illik tədbirində çıxış edərkən 2023-cü ilin antiterror tədbirlərini qınayaraq Azərbaycanı guya Ermənistan ərazilərini işğal etməkdə təqsirləndirib.

Azərbaycan Xarici İşlər Nazirliyi buna cavab olaraq Fransa tərəfini öz tarixindən dərs çıxarmağa, Azərbaycanın daxili işlərinə qarışmamağa və bu cür təxribat xarakterli bəyanatlara son qoymağa çağırıb.

Bildirilib ki, Azərbaycan tərəfinin həyata keçirdiyi tədbirlər beynəlxalq hüququn norma və prinsiplərinə, eləcə də Fransanın daimi üzvü olduğu BMT Təhlükəsizlik Şurasının keçmiş Ermənistan-Azərbaycan münaqişəsi ilə bağlı qətnamələri ilə tam uyğundur.

Habelə Ermənistanın 30 ilə yaxın müddətdə davam edən təcavüzü, həmçinin hələ də Azərbaycanın 8 kəndini işğal altında saxlaması diqqətə çatdırılaraq Fransanın Ermənistanı birtərəfli qaydada müdafiə edən əsassız iddiaları qətiyyətlə pislənib.