Rusiyalı ermənipərəst politoloq İrəvan və Moskvanın münasibətlərindən danışdı | Detallar üzə çıxdı

“Biz ikitərəfli münasibətlərin ən çətin mərhələsindəyik”.

Bunu “Ermənistan və Rusiya qlobal və regional islahatlar kontekstində: dərslər və strateji seçim” mövzusunda keçirilən konfransda rusiyalı ermənipərəst politoloq Sergey Markedonov deyib.

“2-3 il əvvəl demişdim ki, Ermənistan Rusiyanın strateji müttəfiqidir, Gürcüstan NATO-ya meyilli, Azərbaycan isə yelləncək siyasət yürüdən ölkədir. Bu gün vəziyyət çox dəyişib. Rusiya və Ermənistan münasibətləri böhran içindədir.

KTMT-nin sadəcə olaraq səmərəsiz struktur deyil, Ermənistanın təhlükəsizliyinə təhdid olması barədə fikirlər səsləndirilirsə, bu, tamam başqa vəziyyətdir. Belə bir vəziyyətdə qurulmuş münasibətləri kökündən pozmaq yolunu tuta, onların artıq aktual olmadığını söyləyib nöqtə qoya bilərsiniz. Amma mənə elə gəlir ki, vəziyyət tamamilə əldən çıxmayıb, siyasətçilər dəyişir, amma münasibətlər qalmalıdır.

Mövcud böhran vəziyyətindən çıxmaq üçün iki suala cavab verməlisiniz: Ermənistanın Rusiyaya, Rusiyanın Ermənistana nəyə görə ehtiyacı var? Bu suallara cavab olmadan heç nə alınmayacaq. Bu, mühüm amildir. Nikol Paşinyan, Tiqran Avinyan və başqalarından danışanda başa düşməliyik ki, SSRİ dağılan zaman N.Paşinyanın 17, Alen Simonyanın 11, T.Avinyanın isə 2 yaşı var idi. Diqqətinizi zəif nəticə göstərən Rusiyaya yönəltməzdən əvvəl özünüzdən soruşmalısınız: Yüksəkkeyfiyyətli alternativ nədir?”, – o bildirib.

S.Markedonov qeyd edib ki, indi Qərbdən heç bir keyfiyyətli təklif görmür:

“Üstəlik, amerikalı diplomatlar tam dəqiqliklə bildiriblər ki, Qafqazda sülhün əsas məqsədi həm də Rusiya və Çinə alternativ yoldur. Burada nə aydın deyil? Bu vəziyyətdə Ermənistana sadəcə təslim olmaq təklif edilmir, eyni zamanda Rusiyaya qarşı düşmənçiliyi gücləndirilir.

Ermənistan Rusiya üçün son dərəcə vacib ölkədir. Ermənistan həm birləşdirici halqa kimi iri Avrasiya layihəsinə, həm də Qafqazda mövcudluğuna görə Rusiyaya lazımdır”.