Rusiyalı politoloq Laçındakı təxribata görə sülhməramlıları ittiham etdi

“Ermənistan Silahlı Qüvvələrinin növbəti təxribatı, Azərbaycan sərhədini atəşə tutması İrəvanın bütün Cənubi Qafqazda sabitliyi pozmağa yönəlmiş siyasətinin davamıdır”.

Bu sözləri rusiyalı hərbi ekspert Yevgeni Mixaylov Baku TV-yə Ermənistan Silahlı Qüvvələrinin 15 iyun səhər saatlarında “Laçın” sərhəd-buraxılış məntəqəsini avtomat silahlardan atəşə tutmasını şərh edərkən bildirib.

O qeyd edib ki, Ermənistanın Baş naziri Nikol Paşinyanın Azərbaycanla sülh müqaviləsini imzalamağa hazır olduğunu bəyan etməsi və Qarabağı bütövlükdə Azərbaycan ərazisi olaraq qəbul etdiklərini deməsi sadəcə gözdən pərdə asmağa hesablanıb.

Digər rusiyalı politoloq Tatyana Poloskova isə bildirib ki, Ermənistan bu kimi təxribatlara əl atsa da, növbəti dəfə Azərbaycanla müharibə etməyə cəsarət etməz. Çünki buna gücünün çatmayacağını çox yaxşı bilir.

“Baş verənlərə baxanda belə bir sual yaranır: Hadisə baş verən zaman Qarabağda müvəqqəti yerləşdirilən Rusiya sülhməramlıları nə edirdilər və ümumiyyətlə nə işlə məşğuldurlar? Məndə belə bir təəssürat yaranıb ki, onlar orada heç bir iş görmürlər”, – deyə o söyləyib.