Samvel Babayan Prokurorluqda dindirildi | Separatçıların iç üzü açıldı

“44 günlük müharibə zamanı Qarabağdakı separatçıların “rəhbərləri” iki dəfə Ermənistanın Baş naziri Nikol Paşinyana müraciət ediblər ki, nəyin bahasına olursa olsun döyüşlər dayandırılsın”.

Erməni mediasının məlumatına görə, bu sözləri Qarabağdan qovulmuş separatçıların qondarma təhlükəsizlik şurasının katibi Samvel Babayan Prokurorluqda dindirilərkən deyib.

Bildirilib ki, Baş nazirə əvvəlcə Arkadi Qukasyan, Bako Saakyan, daha sonra isə Arayik Arutyunyan müraciət edib. Bir qədər sonra, “parlamentinin deputatları” da Nikol Paşinyana sözügedən məsələ ilə bağlı müraciət ünvanlayıblar.

Qeyd edək ki, Samvel Babayanın dindirilməsi ilə bağlı məlumatı qondarma rejimin katibi Qurgen Nersisyan da təsdiqləyib. Bildirib ki, müharibə zamanı hərbi qulluqçular peşə və ərazilərə görə düzgün bölünmədiyindən şəxsi heyət döyüş tapşırığını yerinə yetirmək iqtidarında olmayıb.

Onun sözlərinə görə, bu problem də orduda fərarilik hallarının artması ilə nəticələnib. “Bildiyim qədəri ilə çox sayda vətəndaş Qarabağ ərazisini təhlükəsiz şəkildə tərk etməyə nail oldu və ya orada qalaraq gizləndi. Səfərbərliyin tənzimlənməsini həyata keçirməli olan qurumlar isə öz vəzifələrini yarımçıq yerinə yetirdilər”, – deyə o çıxışının sonunda əlavə edib.